ألـــــــــــــوان

فراغ ...وفراغ...وفراغ

اعتقد هو ده احساس الشخص اللى فجأه لقى نفسه
فى صحراء


لكن لو المكان مش صحراء يعنى لو كان الجنه زى ما كان

ادم عليه السلام فيها

ليه استوحش ؟؟..ليه مستمتعش بالنعيم اللى فيها

اكبر كارثه فى الدنيا انك تحس انك لوحدك

لوحدك تماما

محدش حاسس بيك.ولا فاهم مالك

انك تحس ان الشخص الوحيد اللى كان بيفهمك

خلاص راح

ساعات الانسان بيحتاج لشخص تانى

يسمعه ويفهم مشاكله ...باختصار يحس بيه

والا الحياه هتكون فراغ.... فى فراغ...فى فراغ

رمادى..رمادى

يعنى لا سماء ولا أرض

ذكريــــــــــــــــــــــــــــا ت

ترى هل تتوقف اهميه الا ماكن والاشياء

على ماهيتها

ترى هل نحب مكان او نكرهه لمجرد انه هذا المكان

هل نرتبط بجسم ما لانه هذا الشئ

ام ان ذلك يتوقف على الابعاد الزمانيه

والنفسيه لنا

انه ذلك الشعور بالحنين لمكان ما

لسبب مبهم

تلك السعاده عند رؤيه مجموعه من الأشياء الباليه التى تحتفظ بها

ويراها البعض على انها لا تستحق

الا ان تكون صندوق اخر من القمامه

انها الاشياء التى تزدحم بها مكتبتك

تؤثر بك وبمستقبلك بشكل ما

انها تشكل تاريخ مزدحم يؤكد لك وبشكل قاطع

انك فى الماضى كنت انسان تؤثر وتتأثر

وكلما مرت السنون تعود لتقع فى غرامها و

تعتريك تلك النشوه والحنين الى الماضى

مره اخرى كلما رأيتها

لتعود وتثبت انك مازلت

انســــــــــــــــــــان

مجرد رأي

قولت لنفسى اقولكوا عن حاجه شاغلانى بقالها
فتره(شغلونى وشغلوا النوم عن عينى ليال)واشوف رأى فيها زيكوا والا
لأ
الحب....اه الحب بضم الحاء
احساس عمرى ما حسيته لحد غير اهلى
ليه!!!! مش عارفه يمكن مش قابلت حد ممكن يحرك مبادئى الراسخه
جوايا ان الحب ده لزوج المستقبل وبس
احتمال... يمكن
لانى مسمحتش ان اى حد يعدى مرحله الزماله المتحفظه معايا
برده احتمال
المهم ان النتيجه واحده وهى انى عمرى ماحسيت ناحيه اى رجل
بشعور مختلف عن الاخرين
لكن تعريفى للحب وهو ما يصفنى فيه اصدقائى
بالخياليه هو
انه احساس غريب يعترى الانسان
شعور لذيذ يدغدغ حواسك
يجعلك قادرا على التضحيه بكل ما لديك من اجل ارضاء الاخر
مجرد شعورك وقت التضحيه بسعادته تكفيك وتجعل التضحيه رخيصه الثمن
هو احساسك بانك مسؤول عن اسعاد شخص وهو مسؤول عن اسعادك
هو التوحد بين شخصين ليكون كل منهما جزء من الاخر يحفظ تفاصيل حياته
يعشق حتى عيوبه
هو القدره على فهم الحبيب والشعور به من نظره..لمسه..همسه
احساس بالثقه بأن هناك من ترمى اليه حمولتك من الاوجاع والهموم
دون ان يعلن امتعاضه ويحاول التخفيف عنك
عندما تريد ان تكبر وتقضى شيخوختك وهرمك بجوار هذا الحبيب
هو ..دونا عن سواه...هو
انسان تحتمى به من وحده الطريق
يا ترى وصلكم مفهومى عن الحب
ياترى هو ده الحب
أفتونى افادكم الله

رتوش

الجديد فى لوحاتى....نزيف الدم العربى

عايز الحق...ارد ليه؟؟؟؟

ارد لييييييييييييييه؟؟؟؟

عمركوا ما جربتوا اوقات يكون مفروض عليك انك

تكون فى موقف مش عايز تكون فيه

ارد لييييييييييه

عمرك حسيت انك مش عايز تسمع بقيه كلام المحترم اللى بيكلمك

ارد ليييييييييييه

ولا حسيت انك مش قادرولا عايز ترد

ارد ليييييييييييييييه

حتى اذا فكرت ترد ..... تقول ايه؟؟؟ ما هو اللى قاله كفايه

وان رديت تقول انهو كلام اللى بتعمل فيه مستهبل ومش فاهم حاجه

ولا ترد بنفس الاسلوب ..الطريقه اللى توجعك قبل ما توجعه

ارد ليييييييييييييييييييييييييه

عمرك قولت كفايه كده ماتقولش حاجه تانيه
.
....ارد لييييييييييييييييييييييه


للدرجه دى الكلمه ساعات بتبقى اكثر الاسلحه ايلاما

واد ايه ساعات بتسيب اثر فينا


بتسيب ندبات.... مش فى الوجه

فى القلب

ارد لييييييييييه


وتشوه البراءه اللى كانت فى شخصيتنا


ارد لييييييييييييييييييه


ارد ليييييييييييييييييييه

ماتقولش ايه ادتنا مصر

ساعات بفكر كتير فى احوال المجتمع اللى عايشين فيه ...وافكر وافكر
كفايه تفكير كده جالى صداع
بألى يومين بفكر انا ايه مدى استفادتى من الكميات الهلاميه من
المواد الدراسيه اللى درستها فى الكليه
وازاى ان البازيك هو بس اللى لسه فاكراه
البدايه كانت لما دخلت طفله ..حوالى 9سنين ..الصيدليه
طلبت حاجات وكان الباقى لها 40 جنيه
ادتها الباقى وسالتها 20+20 كام
وبعد تفكير عميق جدا
قالت عشرينتين.
شوفتوا التعليم فى بلدنا
بعدها بكام يوم دخلى طفل تانى ...مش عارفه ايه حكايتى مع الاطفال.... وقف ,اتلفت حواليه
عايشنى فى جو ساسبنس حوالى 3 دقائق
لحد ما سألته نعم ..بتدور على حاجه
نسيت اقول لكوا ان سنه تقريبا 13سنه
قالى انا جيت امبارح انا واختى اشترينا حاجات من هنا وكان لينا باقى 7جنيه
بس مش حضرتك يا طنط اللى كنت هنا
اختكوا طبعا بتتجنن لما حد يقول لها يا طنط
وبعدين بحس ان دى الحقيقه
فبمسك اعصابى
وبقول لنفسى معلش يا كوكو
وساعات اقول طنط دانا اللى اقولكوا يا طنط
المهم مش ده موضوعنا
كنا بنقول ايه يا دودو ... ايه !! اه برافو
خليكوا كده صاحيين
رديت وقلت هى زمانها جايه تعالى كمان نصف ساعه خدهم منها
وتانى يوم كنت نسيت كل حاجه .,.ولما جت الدكتوره
حكت لى نفس السيناريو السابق بس الفرق ان هى كانت البطله بدلا منى
والفرق الاكبر انها ا دته الفلوس وال صعب عليها ادته عليهم من جيبها الخاص
تفتكروامين فيهم خريج الجامعه
الحاجات دى خلتنى افكر اد ايه الطفل عندنا زكى
واسلوب التعليم والمناهج الدراسيه
بتدمر ده فيه
واد ايه احنا بنستغل دهاءنا فى حاجات سيئه
وربنا يخلى لنا سيادة الرئيس
ووزير التعليم والساده المدرسين ويبهدلوا فى التعليم كمان وكمان

انا مساااافر

دخلت النهارده المدويه ,,وكنت مستعجله
غريبه ....
النهارده قالولى (ماما وبابا طبعا) فى اعلان فى الاهرام عايزين فيه صيدلانيات ...ااات مش صيادله زى ما بتحجج واقولهم دايما
طبعا انا كالعاده سمعت الكلام من الودن دى وخرجته من التانيه يعنى ودن من طين وودن من عجين انا مش رافضه السفر لكن رافضه فكرة انى اسافر وانا مش مستقره ..صحيح هسافر ومعايا بابا وماما زى كل الامهات كل اللى يهمها انى استقر وارتبط بتقول مادام الشباب اللى هنا مش عاجبينك يمكن تلاقى هناك,,لكن واه من لكن انا للاسف عارفه مشروعات الزواج بتتم ازاى هناك1.
.بنت فى نفس البلد يعنى مفيش مصاريف استقدام.2
بتشتغل يعنى هتغطى مصاريفها واحتمال توفرلى
.3.. ويا سلام لو باه شكلها كويس يبقى كدة المشروع ناجح الحمد لله
اما عن هنا هتؤلوا اللى هنا مش عاجبينك ليه هقول من العاهات اللى شوفتها. البديه كانت مع واحد قريبنا من بعيد شافنى لاول مره وياريتو ماشافنى كلم بابا وبابا ضغط عليا بشتى الطرق انى اوافق ناس كويسين وهيحافظ عليا زى ما قال
المهم دورت على سبب للرفض مفيش مش عشان انا عاوزة ارفض وخلاص لكن عشان مكونتش مرتحاله
لكن استسلمت فى الاخر ووافقت
وعينكوا ما تشوف الا النور كدب فى كدب كل كلمه وكل حرف قاله كان كدب
والحمد لله ربنا خلصنى بعد فتره من قراءة الفاتحة بعد ما حطم فى حاجات كتير كفايه بقى يبقى حد يفكرنى انى ما اتكلمش عن الرجاله عشان راى فيهم مش هيعجب ناس كتير
واحلى سلام للبنات بس لانى دلوقتى فاكرة للولاد حاجات كتير وحشة

اول مره

دى اول مدونه فعليه لى......
بصراحه سالت نفسى كتير قبل ما اكتب هو ايا لما اكتب اللى انا حاسه بيه هحس براحه فعلا ولا هفكر واناقش نفسى فى حاجات بتحصل كل يوم واخر اليوم بحاول انساها وافكر فى اي حاجات تانيه عشان اقدر اضحك مع الناس واقدر انام,, بس الت اجرب لانى مؤخرا معنديش القدرة انى احكى اى حاجة لاى حد
يمكن لانى عارفة ان مفيش فايده مش هيفهمونى وان حصل و فهمونى مش هيادروا يغيروا حاجه,,عموما هنشوف ...... كفايه كدة جرعة الكابه دى, صح !!!
زمان اللى هيقرا البوست دة هيقول البنت دى معقدة
اكيد,, انا نفسى بدات اصدق ده...
على فكره الكتابه بالعربي صعبه اوى ..